Androzentrikoa eta sexista. Horrelakoa da hizkuntza heteropatriarkatuaren ondorioz, Steilas sindikatuak salatu duenez. Zorionez, bada aldatzerik. Eraldaketa hori helburu kaleratu du hizkuntza era inklusiboan erabiltzeko baliabideak ematen dituen eskola materiala.
"Zenbat seme dituzu?" galdetzea "Zenbat seme-alaba dituzu?" itaundu beharrean edota -sa atzizkia txertatzea euskarazko hitzetan: alkatesa, aktoresa... Horiek dira hizkuntza sexista bihurtzen duten ezaugarrietako batzuk. Bestelakoak ere badaude: estereotipoekin lotuta erabiltzen diren hitzak, mezuen asimetria, irudi sexistak erabiltzea eta beste. Horiei guztiei alternatibak bilatu nahian taxutu dute Komunikazio inklusiborako gida.
Hainbat iturrietatik elikatutako materiala da Steilasek aurkeztutakoa: Amelia Barkinek 2008an Emakunderekin argitaratutako Euskararen erabilera ez sexista eta Amaia Zubieta Gartziandaiak gauzatutako Komunikazio ez sexistarako gakoak gidak ditu oinarrian.
Materiala Steilas sindikatuaren webgunetik deskarga daiteke.