"Bildurekin eta ezker abertzalearekin erabat identifikatuta dagoen taldea da. Bere hitzetan eta kantuetan, gorazarre egiten die Iruñeko alkatearen udal taldearen ideiei, baita ETA talde terroristako presoen ideiei ere". Maite Esporrin PSNko kidearenak dira hitzak. Iruñeko Udaleko Hiritarren Auzietarako Batzordean mintzatu da, Tximeleta taldeak pasa den larunbatean Batasunaren Agiriaren karietara emandako kontzertuaren inguruko azalpenak eskatzeko. Talde hori zer dela eta kontratatu zuen galdetu dio udalari eta zalantzak azaldu ditu "udalak erabilitako irizpideen inguruan".
Gogor ekin du Joseba Asiron Iruñeko alkatearen aurka, izan ere, "iruindar guztien zergak erabiliz ETAren terrorismoari lotutako pertsonen omenezko ekitaldiak onartzea, babestea eta sustatzea" leporatu dio.
Jokoan: adierazpen askatasuna
"Sorgin ehiza". Horrela bataiatu du Tximeleta taldeko kide Zatok PSNk haien aurka esandakoa, Ahotsa.info webgunean egindako elkarrizketan: "Oso larria iruditzen zaigu PSNk gure kontra esan dituenak. Onartezina! Ematen du batzuek, politikari izanagatik eta protagonismo bila haien momentikoa aprobetxatzeagatik, libre dutela nahi dituzten astakeriak eta gehiago esateko".
Nolanahi ere, polemikak polemika, etorkizunean jarri du mira musikariak: "Adierazpen askatasuna dago berriz ere jokoan, eta horren alde egiteko, guk egiten dakiguna egiten jarraituko dugu, plazaz plaza, herriz herri".
PSNren webgunean irakur daiteke Tximeleta taldearen inguruko irakurketa osorik.