"Ez dauka zentzurik [bost gizonak] kartzelan jarraitzeak". Martinezek esan du, sanferminetan emakume bat bortxatzea leporatuta epaitzen ari diren bost gizonen defentsan. Haren ustez, "guztiz errugabeak" dira. Bideokonferentziaren bitartez deklaratu dute haien kontrako epaiketan.
Beren deklarazioek "erabateko koherentzia" dutela azpimarratu du, ildo beretik, eta gizonak "sufritzen" ari direna izan du gogoan: "Oso gaizki pasatzen ari dira, egoera oso latza bizitzen ari dira".
Grabatuta daukate
Uztailaren 7an, sanferminetan, emakume bat bortxatu, grabatu eta sakelakoa lapurtu zioten bost gizonek, inori konta ez ziezaion. Hori dela medio, bost sexu eraso egitea leporatuta prozesatuko dituzte orain ustezko bost erasotzaileak, bai eta lapurreta egotzita ere.
Frogek "argi" uzten dute, magistratuaren irudiko, bortxatzeaz gain, gizonek "biktimari barre" egiten ziotela; halaber, grabatzea bera "irain gaineratua" dela azpimarratu du epaileak.
