Iruñeko udaltzaina da atxilotuetako bat, eta aske utzi dute behin-behinean. Udalak aditzera eman duenez txostena zabaltzeko tramiteak abiatu ditu dagoneko.
Espainiako, Frantziako eta Paraguaiko poliziek egin dute operazioa eta hamabost emakume askatu dituzte guztira. Talde batek emakumeen salerosketan eta sexu esplotazioan ziharduela jakin zuen poliziak biktimetako batek Espainiako Poliziari egindako dei baten harira. Paraguain lanpostuak eskaintzen zizkieten, eta Europara eramaten zituzten; ondoren, Iruñean, Naoneden (Bretainia) eta La Roche sur Yon-en (Frantzia) prostituzioan aritzera behartzen zituzten.
Behin Iruñean, Naoneden eta La Roche sur Yon-en, bidaiarengatik 3.000 euroko zorra esaten zieten, bezeroei kobratu beharreko diru kopurua zehaztearekin batera. Espainiako Barne Ministerioak zehaztu duenez, atxilotuek erabateko kontrola zuten emakumeekiko.
Joseba Asiron alkateak “zuhurtzia” eskatu du eta esan du afera honen alde onena dela sare hori deseginda gelditu dela.