Artistek eta sorkuntzak hartuko dituzte kaleak gaurtik aurrera Arrosadian. Aurtengoa jaialdiaren zortzigarren bada ere, Alde Zaharra ez den beste toki batean egite den lehenengo aldia da.
Arrosadiara mugituta ere, aurreko edizioetako espirituari eutsiko diote: "artista guztientzat zabaldutako espazioa" izanen da, nahi duen horrek har dezake parte. Hala, "aldaketa erreminta gisa" erabiliko dute artea, "auzoa sortzeko bai eta kulturen arteko elkarrizketa ontzeko ere".
Besteak beste, hiri artea, birziklatze tailerra, haurrentzako jarduerak, ipuin kontalaria eta txotxongiloak, dokumentalak, erakusketak eta zuzeneko emanaldiak prestatu dituzte.
Arrosadian, gainera, bertako dendak, eragileak, liburutegia, gizarte zerbitzuak eta beste ere inplikatuko dituzte.
Iruñeko Udalarekin hitzarmena sinatu dute aurtengorako, eta honakoak eskaini dizkie: oholtzak, karpak, musika ekipoak, aulkiak eta mahaiak, muralak margotzeko margoa eta beste. Materialak ez du 15.000 euroko kostua gaindituko.
Artisten Auzoa dinamikaren webgunean eskuratu daiteke informazio gehiago.