Kantua, dantza, akrobazia eta zuzeneko musika eskainiko dute Jaso ikastolako ikasleek Batek daki! ikuskizunean. Gazteek eurek sortzen dute musikala eta euren esku izaten da prestakuntza guztia. Proiektu interesgarria dela diote irakasle eta ikasleek. Adin desberdinetako ikasleen elkarlana sustatzen du, gustatzen zaiena egiten dute eta ongi pasatzen dutela ere nabarmendu dute.
49 ikasle ariko dira musikalean parte hartzen. Imanol Janices, Edu Serna eta Irantzu Zabalza irakasleak izan dira gidari lanak egin dituztenak.
Ostiralean ikusgai izanen da lehen aldiz Barañaingo Auditorioan 20:00etan. Ondoren, Baluarten ekainaren 3an eta Donostiako Victoria Eugenia agertokian abenduaren 2an.