Edo ez da inoiz egin edota galdu egin dute. Iruñeko Udalaren inbentarioak arazo hori dauka, erren dagoela, edo, are okerragoa dena, ez dela existitzen. Joseba Asiron alkateak iragarri du asmoa dena txukuntzea eta materiala herritarren esku jartzea dela. Hasi dira jada bide horretan.
"Harrigarria da inork materiala zerrendatu ez izana, eta horren inguruan dagoen ezjakintasun maila. Eta kezkatzekoa da Iruñeko Udala kudeatzen dutenek urteetan esfortzurik batere egin ez izana ondarea zein den eta non dagoen jakiteko". Asironek egindako irakurketarenak dira hitzak.
Luxuzko liburuak, hautsa pilatzen
Behin bazterretan begiratzen hasita, bitxikeria bat aurkitu dute: Pamplona-Iruña, irudiak eta hitzak liburuaren luxuzko edizioaren 1.100 ale. Ikastetxeetan, liburutegietan eta Civivox zentroetan utziko dituzte; baina, horrez gain, herritarrei ere banatuko diete, apirilaren 23an, liburuaren egunarekin bat.