1983tik alderdien esku utzi du txupinazoaren jaurtiketa UPNk. Hori bai, ezker abertzaleari tokatu zaion lau alditan txanda pasa egin, eta aukera kendu dio. Aurreko urtekoa ere berezia izan zen: Iruñeko Orfeoiak eta La Veleta Peñak bota zuten.
Baina, hemendik aurrera, zer? Zeinek izanen du sanferminei hasiera emateko ohorea? Udalbatzan hiru proposamen egonen dira ostegunean eztabaidagai.
EH Bilduk sanferminetako mahai orokorrean dauden eragileen artean pertsona batzuk aukeratzea nahi du; ostean, izen horiekin herri galdeketa egin, eta horrela txupinazoaren jaurtitzailea hautatzea du helburu. Era horretan, herritarrek uztailaren 6an bertan jakinen lukete nork piztuko duen suziria.
Ohorezko Zapiari segika
Bestelakoa da Geroa Bairen proposamena: Batasunaren Pribilegioaren egunean Ohorezko Zapia jasotzen duen pertsonak hurrengo urteko Txupinazoa bota dezala proposatu du.
Iñaki Cabases zinegotziaren arabera, Ohorezko Zapiaren hartzailea, eta hartara Txupinazoaren jaurtitzailea, “Iruñearen izena eta historia edertzen lagundu duen pertsona bat” izan beharko litzateke. Hura hautatzeko tenorean, Udalbatzako gehiengo osoa aski izatea eskatu du Geroa Baik.
Alderdien esku
Betikoa. Alderdietako ordezkariek botatzea. Horra UPNk eskatu duena. 1983an akordio tazitua onartu zuen Julian Balduzek (udaltzaren babesik gabe), eta geroztik alderdien eskumena izan da.
Nolanahi ere, eta eztabaidak eztabaida, alkatetzaren eskumena da, eta, beraz, hark du azken hitza.