Barrikada taldearekin josi zuen La tierra esta sorda proiektua Enrique Villarreal El Drogas-ek, Gerra Zibilaren gertakari lazgarriak ardatz. Hamazazpi abesti harilkatu zituen eta memoria historikoaren uretan murgildu zen. Ostiraleko kontzertuan islatu eginen du orduko lana, bandaren akordeei lotuz, eta, jo bitartean, gudaren gordina biltzen ahalegintzen diren irudiak proiektatuko ditu.
Memoria. Alzheimer lanaren zilbor hestea da. Gaixoen eta senideen barrunbeetan arakatu zuen El Drogas-ek eta aurkitutako bizipen horiek sorkuntza-gai bihurtu zituen. Orain, oholtza gainean aurkezteko ditu piezak. Izan ere, Madrilen (Espainia) baino ez ditu ezagutzera eman momentuz.