Karmen kaleko 20.ean du egoitza Nafarroako San Fermin Ijitoen Elkarteak. Casa Sabicas izenarekin ezaguna da. Joan den urtean zabaldu zituen ateak egoitza horrek. Ordutegiak ez dituelako betetzen eta auzokideen kexa ugariren ostean Iruñeko Udalak espedientea zabaltzea erabaki du.
Ijitoen Elkarteak orain aukera izanen du alegazioak aurkezteko eta Udalak espero du Casa Sabicasen aurrera daramaten proiektu kulturalak aurrera segitzea, baina, hori bai, garai batean sinatutako hitzarmena beteta.
2013ko urrian Udalak Nafarroako San Fermin Ijitoen Elkarteari Karmen kaleko 20.eko lokala doan uztea onartu zuen. Kulturen arteko elkarbizitza sustatzeko hitzorduak eta ijitoen kultura zabaltzeko konpromisoa hartu zuen elkarte horrek.