Udalak eskainitako eraikina aintzat hartu badute ere, okupazioaren zilegitasuna ekarri dute gogora, larunbatean egindako prentsaurrekoan. "Bidea okupazioaren bidez egin dugu, hortaz, baliozko tresna izaten jarraitzen du. Era berean, eraikina bera sekula ez da helburu izan bere baitan, baizik eta bide bat gure proiektua garatzeko".
Urratsak ematen segitzeko aukera emanen dielako hartu dute, beraz, Caparroso kaleko etxea. "Hau ez da jasandako presioen ondorioz izan, baizik eta asanbladak bere proiektuaren beharrizan eta ezaugarriei egokitzen den eraikin baten beharrari irmo eutsi izanagatik".
Halaber, negoziazio prozesuen nondik norakoak izan dituzte hizpide, beti "negoziaziorako prest" egon direla azpimarratuz.
Titulartasunaren eta erabileraren inguruan zabaldutako berriak gezurtatu dituzte, eta "lokal autogestionatuen defentsan" aritu direla utzi nahi izan dute argi.
Asanbladaren Facebookeko orrian irakur daiteke prentsa oharra osorik.