Etxekoak antzezlana istorio pertsonal batetatik abiatzen da. Itsasoaz bestalde maitemindu egiten da neska gaztea. Atzerriko lagunarekin egoteko aukera bakarra ezkontzea izan zen. Eta hor hasi zen dena: burokrazia, paper administratiboak, joan etorri zenbaezinak, elkarrizketak kontsulatuan... urtetako erokeri eta zentzugabekeria hutsa. Esperientzia horretatik abiatuz, egungo gizarteak eta estatuek sortu eta eraiki dituzten muga eta lege absurduen kritika egitea da antzezlan berri horren xedea.
"Etxekoa/kanpokoa dikotomian gaur egun hain presente dugun inmigrazioaren gaia jorratuko dugu", azaldu du Ander Lipus zuzendariak. Artedramaren magalean Huts Teatroaren bigarren sorkuntza da. 2013an Publikoari Gorroto antzezlana taularatu eta 45 emanaldi egin ondoren, oraingoan Etxekoak lana taularatuko du. 7 urte ondoren Jon Gerediaga (idazkeran) eta Ander Lipus (zuzendari eta aktore moduan), berriro sorkuntza horretan elkartzen dira antzerki obra hau eskaintzeko.
Sarrerak 8 euroan daude eskuragarri.