Aurresku batek ekin zion 10. urteurreneko ospakizunari. Iruñean Kantuz taldeak urteurren berezia du aurten eta ekitaldiz beteriko eguna izan zuen igandean. Udaletxe plazan Zorionak Iruñean Kantuz, Hamargarren urteurrena 2005-2015 irakur zitekeen pankarta batean eta jendearen artean Iruñean Kantuz taldearen inguruko informazioa banatu zuten.
Euskal Kantuzale Elkarteko Mikel Haranburuk hartu zuen hitza ekitaldiaren hasieran. Eskerrak eman zizkien bertaratu ziren guztiei, bereziki, Donostiatik Kantu Jira ekimenaren baitan hurbildutakoei eta hamar urte hauetan eurekin batera kantuan aritu diren baina egun ez dauden horiei. Eugenio Arraiza gogoratu zuten bereziki, Kantu Jira ekimenean hain garrantzitsua izan zen kidea. Pello Goñiri ere eskerrak, urte askoan Iruñean Kantuz gidatzen aritu delako.
Iruñeko alkatea ere izan zen urteurrenean. Iruñean Kantuz taldea zoriondu eta eskerrak eman zizkien Alde Zaharrean euskarazko kantuak abesteagatik. Bertsolariak ere izan ziren tartean eta hamaiketakoaz gozatzeko aukera ere izan zuten.