2015/06/24 19:00
Garabide elkarteak egindako dokumentala ekainaren 24an, asteazkenean, eskainiko da Iruñean, Kaldereria kaleko udal aretoan, 19:00etan, Nafarroa Oinezekin elkarlanean.
Euskararen eta Ameriketako jatorrizko hainbat hizkuntzaren egoera oinarri hartuta, komunitate bakoitzaren errealitateaz, batzuek besteenganako begiradaz eta elkarren berri izanda hizkuntzen garapenerako ikas daitekeenaz mintzo zaigun produkzioa da.
Hainbat galdera planteatzen dira; zer ari da gertatzen Ameriketako jatorrizko hizkuntzekin? Nola ikusten gaituzte euskaldunok gainerako hizkuntza gutxituetako hiztunek? Lagun al dakieke euskal esperientziak beraien hizkuntza berreskuratzeko prozesuan?
Hamalau pertsonaren eskutik, Ameriketako zazpi hizkuntza komunitateren egoera plazaratzen du dokumentalak; kitxua, nasa, nahuatl, kaqchiquel, aimara, maputxe eta maia yukaterenak hain zuzen.
Dokumentala eman eta gero, Andoni Barreña eta Ander Bolivarrek solasaldia gidatuko dute.
Otsailaren 24an estreinatu eta Euskal Herriko hamalau herritan aurkeztu ondotik, Nafarroan emanen da lehen aldiz, Nafarroa Oinez eta honen baitan dagoen Txikiak Handi proiektuarekin batera antolatuta. Sarrera doakoa izanen da.
EUSKALERRIA IRRATIAzale hori:
FM 98.3ko zein euskalerriairratia.eus webguneko edukiak musu truk entzun, irakur eta ikus ditzakezu.
Zuretzako eskari bat dugu: posible baduzu, lagun gaitzazu gero eta eduki gehiago eta hobeak sortzen, Iruñerriko euskaldun ororen eskura jartzeko.
Izan ere, zenbat eta komunitate handiagoa, orduan eta proiektu komunikatibo eraginkorragoa.