Pop estiloa nagusi den ‘Tania tank’ lana aurkeztuko du Tania de Sousak gaur Erraldoien Txokoan. Pop-a nagusi baina rock-a, punk-a eta soul-a ere uztartu ditu De Sousak bere diskoan. Bakarka sortu duen lehen lana du abeslariak eta hamabi kantuz osatu. 20:30ean izanen da formatu txikiko kontzertua Descalzos kalean Kantu eta Hitza zikloaren barruan. Doakoa da sarrera baina ordu bete lehenago eskuratu beharko da gonbidapena.
Ahotsean ariko da De Sousa baina laguntza ere izanen du: Fermin Bouza izanen da gitarrarekin, Maitane Alonso baxuarekin eta Ander del Sol bateriarekin.
Tania De Sousak The Dispositives, Zuloak…taldeetan aritu ostean bakarkako ibilbideari ekin dio. Horretarako lehenengo diskoa grabatu du 2014ko maiatza eta ekaina bitartean Bonbereneako (Tolosa) estudioan Karlos Osinagaren 'Txap' aginduetan eta Fermin Muguruzak ekoiztua. Hamabi kantuetan nagusitzen diren pop melodiak ditu ezaugarri artista honen lehenengo lanak.
