Indarkeria Sexistaren Kontrako Emakumeen Plataformak deitu du elkarretaratzea iluntzeko 20:00etan Iruñeko Gazteluko Plazan, ‘Emakumeon kontrako indarkeriarik ez' lelopean.
Ostegunean Gasteizko Ricardo Buesa kaleko 3. zenbakian izan zen hilketa, genero indarkeriaren zantzuak dituen aurtengo lehena Euskal Herrian. Ertzaintzak bikotekidea atxilotu zuen hiltzailea delakoan. Eusko Jaurlaritzako Segurtasun Saileko iturriek adierazi dutenez, ustezko hiltzailea bera joan zitzaien ostegun arratsaldean kalean zeuden bi ertzaini jazoeraren berri ematera: adierazi zien emaztea hil zuela, aizto batekin. Hark esandako tokira joan zirenean, hain justu, hilotz aurkitu zuten andrea.
Ertzainek adierazi dute beraienean ez zuela inoiz andrazko horrek genero indarkeriarekin lotutako inolako salaketarik jarri. Gizona berehala atxilotu bazuten ere, ikerketa bat abian da jazotakoa argitzeko, eta hainbat ertzain bikotearen etxean izan ziren atzo iluntzera arte, horrelakoetan ohikoak diren miaketak egiten. Besteak beste, ustez gizonak andrea hiltzeko erabili zuen aiztoa hantxe aurkitu zutela jakinarazi dute.