Iruñeko Orfeoiak 150 urte bete ditu martxoaren 19an. 1865. urtean sortu zenetik sari hainbat jaso ditu, Euskal Herrian bertan eta gure mugetatik haratago ere.
Abesbatzako zuzendari Igor Ijurraren esanetan,“Orfeoiak beti izan du itzal handia Iruñean eta Nafarroan. Bisitatu ditugun herri guztietan bete egin ditugu aretoak. Musika klasikoaren zaleak ez ezik, klase orotariko herritarrak erakarri ditugu eta hori handia da guretzat”.
Musikari etxarriarrak hamar urte daramatza Orfeoia gidatzen. Gehien bat, azken hamarkada honetan ibili da abesbatza nazioartean. “Zirkuitu berriak ireki ditugu atzerrian. Asko ikasten da horrela. Bide batez, garrantzitsua da kanpoan erakustea hemen egiten dugun musika, gure jatorria eta sustraiak azagutzera ematea”.
Abesbatza amateurra da. Horrek, taldea asko aberasten duela adierazi digu Ijurrak. Balio handiak lantzen direla dio. Besteak beste, elkarlanaren garrantzia, persona ezberdinen arteko harremana eta diziplina.
Aurrera begira, erronka ugari ditu Orfeoiak. “Gazteak erakarri nahiko genituzke. Abesbatzek eta orkestrek errepertorioak egokituz beste estilo batekin landu ditzakete obrak, teknologiari erne erreparatu behar diogu, beti ere garena izateari utzi gabe”.
Euskalerria Irratian izan dugu Igor Ijurra. Elkarrizketa egin diogu orain arte eginiko bideaz, egungo egoeraz eta etorkizuneko proiektuez. Tarteka, Orfeoiak abestutako zenbait grabazio entzuteko parada izan dugu.