'Goitik behera, behetik gora' filmaren estreinaldia, Punto de Vista mintegian

'Goitik behera, behetik gora' goitibeheren inguruko filma aurkeztuko du WeareQQ taldeak gaur Iruñeko filmotekan, ilunabarreko 20:00etan zein gaueko 22:00etan. Vicente Vazquezek eta Usue Arrietak osatzen dute taldea, eta haien dokumental honetan oreka berria bilatu nahi izan dute istorioaren, paisaiaren eta apustu estetikoaren artean. Pelikulan, euskara zein gaztelera entzun daitezke. Iazko Punto de Vista zinema jaialdiko X Films lehiaketara aurkeztu zuten pelikula egiteko proiektua, eta lehendabizi hautatua eta gero ekoitzia izan zen. Reyes Ilintxeta lankidea Usue Arrietarekin mintzatu da.

Jakina denez, Nafarroako Gobernuak Punto de Vista jaialdia mintegi soil bilakatu du, eta formatu murriztu horretan gauzatzen ari da. Mintegiak larunbatera arte iraunen du.  INAAC (Ikus-entzunezko Arteen eta Zinemaren Nafarroako Institutua) da antolatzailea. Ekimenak ez-fikziozko zineman edo zinema dokumentalean sortzen diren proposamen berriak ikus-entzuleei erakustea du helburu nagusi. Aurten izen emanda dauden 108 parte hartzaileek Amir Muhammad malaysiarra eta Sylvain George zuzendari frantziarra eta haien lanak ezagutzeko aukera izanen dute.

Bestalde  Punto de Vista Jaialdiak, X Films proiektuaren bidez, urtero proiektu bat hautatu eta  ekoizten du. Aurten Oskar Alegría iruindarra, Diana Toucedo eta Jorge Turren lanen artean aukeratu beharko dute. Ostiralean gaueko 20:00etan eta 22:00etan ezagutu ahal izanen dira zuzendari hauen egitasmoak eta baita iaz hautatu eta ekoiztutako lana,  Goitik Behera, Behetik Gora.

Aipatzekoa da Nafarroako Gobernuak Puntu de Vista jaialdia mintegi soil bilakatzen zuela, aurten hainbat zinemazalek zinemaldi alternatiboa antolatu dutela: OFFF PDV ¡Retaguardia! Arista guztiek musu truk parte hartzen dute.

Webguneko azaleko irudia: Punto de Vista.

[youtube]http://www.youtube.com/watch?v=5xwBx2TlEe0[/youtube]