Hautsi da gehiengo sindikala. Gehiengo sindikala hautsi da. Nora joaten dira, hil ondoan, gehiengo sindikalak? LAB badoa aita-amen etxera. Pisu bila ari da ELA, mutilzahar porrokatua. Kalapita handirik gabe egin dute. Agerian bederen ez dituzte beren afiliatuak lotsarazi. Ez dago hagitz garbi zerk uztartzen zituen, maitasunak edo sexu hutsak.
Behialako su hori ez da, dena dela, arrunt itzali. Noizbehinkako elkartzeak ez dituzte baztertzen. Heldu den asterako badute hitzordua. Gau bolkanikoa izanen da, beharbada, garai loriotsuetako izerdi eta intziriak berrituko dituena. Gehiengo sindikala, hiztegi zehatza Bizkaian, Gipuzkoan eta Araban. Nafarroan, berriz, soberania linguistiko bat, errealitateak egunero ezeztatzen zuena. Hemen gehiengo sindikala bertze bat zen, bertze bat da. Ongi-edo egon zen, iraun zuen bitartean.
