Washington, Mosku, Pekin, Kuala Lumpur zein Cadreitako karriketan Euskalerria Irratia entzun ahal izanen duzu aurrerantzean, baldin eta smartphone bat baduzu, hau da, interneteko lotura duen sakelako telefonoa.
Miraria posible egiten duena, Uhinbak aplikazioa, Fidbak enpresak eta Antxeta Irratiak elkarlanean loraturiko proiektua, Berria Fundazioa, Gipuzkoako Diputazioa eta Eusko Jaurlaritzaren laguntzarekin.
iPhone zein Android telefonoetan erabil daiteke, eta orotara euskara hutsean diharduten hamar irrati entzuteko parada eskaintzen du.
Aplikazioak etorkizunean aukera gehiago eman ditzake, haren bultzatzaileen arabera: "Euskarazko irratiak edonork, nonahi eta noiznahi entzun ahal izatea gure lehen erronka izan da, baina ez azkena. Aurrerarantzean zerbitzu gehiago eskaintzea baita gure asmoa". Aplikazioa jaisteko, klik egin hemen.