Josi Basterretxea
Senperera begiratzeko irrikaz jaiki naiz gaur. Atzo bertan izan baitzen euskal eskolen festa nagusia Bidasoaz iparraldera. Euskal Herrian argia ikusten duten zazpi egunkariren azalak arakatu ditut Herri Urratsen argazkien bila, pentsatuz gai garrantzitsua zela. Erratuta nengoen.
Zazpi egunkari horietatik, hiruk badakarte argazkia. Bik txikia. Batek handixeagoa. Diario de Noticias eta Diario Vasco dira argazki txiki bana azaltzen dutenak. Gara, handiagoa dakarrena. Diario de Navarra, Correo, Deia eta Veinte Minutos direlakoek, argazkirik ez. Aipamen nabarmenik ez.
Egunkari garrantzitsuak dira horiek Euskal Herrian. Irakurle asko dituztenak. Iritzi soziala sortzen laguntzen dutenak. Baina, Herri Urrats ez zaie lehen orrialdera eramateko modukoa iruditu. Zergatik ote?
Agian ez dugu asmatu euskaldunok horrelako egunkariak hurbiltzen Senperera. Agian eurak dira Senpereko lakuan bainurik hartu nahi ez dutenak.
Gizarte-konbibentziaz hitz egiten denean, elkarbizitza sozialaz hitz egiten denean… konbibentzia linguistikoaz hitz egitea ere ez legoke batere gaizki.