Josi Basterretxea
Argazki bat eta bi titular, horiek jo ditut begiz goizean. Argazkian ikusten dut Michéle Alliot-Marie, Frantziako Kanpo Arazoetarako ministroa atzora arte. Titularretan, honako bi hauek irakurri ditut: Haizearen Indarra, bata; bestea, Izua Ontzian.
Ben Ali Tunisiako mandatari ohiarekiko harremanak direla-eta eman du dimisioa Michéle Alliot-Mariek. Munduko emakume boteretsuen artean, hamaikagarren postuan ezarria zuen Forbes aldizkariak. Errebolta arabiarraren haizeak bota du kargutik.
Kanpo-arazoetarako ministerioko ardurak utzi ditu bart Alliot-Mariek. Lehenago beste batzuk izan zituen: Justizia, Barne-saila, Gazteria eta kirola… Horiek guztiak, Eliseoko ontzian.
Euskal Herrian ere izan ditu bere ardura politikoak: Ziburun eta Biarritzen zinegotzia izana da; Donibane Lohitzunen, alkate. Argazkian ikusten dut Alliot-Marie, beti bezain dotore. Beti gustatu izan zaizkit ministro-ohiaren arrakadak, belarritakoak.
Pentsatu dut zenbat egin duen politikari horrek Frantziaren eta Frantziako eskuinaren alde. Eta zer gutxi egin duen Euskal Herriaren alde, euskal departamentuaren alde, euskararen alde. Agian, hurrengo erreenkarnazio politikoan egingo du Zibururen alde, Biarritzen alde, Lohitzunen alde… euskaldunen alde.
Agian. Hala bedi.
[audio http://euskalerriairratia.com/wp-content/uploads/2011/03/joxi-basterretxea-ots28.mp3]