Hogeita bost urte bete dira gaur, Nafarroako Gobernuari Iruñerrian irrati euskalduna eratzeko lehen eskaera formala egin zitzaionetik, idazkia haren erregistroan aurkeztuz. Gaur, 25 urte geroago, 25 euskaltzalek beste eskaera bat aurkeztu dute erregistroan. Galdegiten dutena, Nafarroako Gobernuak Euskalerria Irratiari baimena eman diezaiola behingoz, baina ez bakarrik analogikoki emititzeko, baita aurki indarrean jarriko omen duten sistema digitalean aritzeko ere. Gaurko eskaeraren aurkezleen artean, duela mende laurdenekoa sinatu zutenetako batzuk, 25 urteko gazteak, euskalgintzako zein kulturgintzako ordezkariak, Euskalerria Irratiko langileak, entzuleak, bazkideak, lagunak. Erregistroan eskaera aurkeztu dute, eta ekitaldira hurbildu diren kazetari ugarien aurrean, adierazpena. Jarraian, agiri biak.
[audio http://euskalerriairratia.com/wp-content/uploads/2010/05/25urte.mp3]
Eskaera
Jaun andere agurgarri horiek:
JOSE ANTONIO SOLANO ARRATIBEL jaunak, N.A.N. 15135548, IRUÑEKO KOMUNIKABIDEAK S.A.ren kontseiluburuak, elkargo honen ordezkariak
AZALTZEN DU
1. Iruñeko Komunikabideak SA irratia, telebista eta bestelako entzun-ikusteko hedabideak instalatu eta ustiatzeko sortua izan zela, beti ere euskararen erabilpenari eta sustapenari arreta berezia egiteko asmoz.
2 Helburu horri begira, halako egun batean, duela 25 urteko maiatzaren 24an, eskaera formala egin genion lehen aldiz Nafarroako Gobernu horri, ahalik eta lasterren eman ziezagun Frekuentzia Modulatuko uhinen bitartez emititzeko baimena.
3 Orduko idazki hartan, Foru Hobekuntzaren Legeari aipu egin genion, zehazki 55. artikukuari, horrek aitortzen baitio ahala eta eskumena Nafarroari bere lurraldean irratigintzari doazkionak arautzeko eta erabakitzeko.
4. Hogeitabost urte iragan ondoren, orduko eskari hari eutsiz berriro zuengana jo dugu oraino ez baita aintzat hartua izan Iruñerrian euskaraz ari den irratirako baimen eskea.
5. Baimena iritsi bitartean Euskalerria Irratia lanean hasi zen, 1988ko azaroan. Irratiaren arduradunak behin eta berriro saiatu dira emititzeko baimen administratiboa eskuratzen. Ezezkoa, ukapena izan da behin eta berriro Nafarroako Gobernuaren erantzuna.
6. Honako idazki honen maiztasun modulatuko uhinen (FM) bidezko emisio analogikoan aritzeko baimena eskatzen dizuegu, teknologia modu hau heldutasun-arora iritsia baldin bada ere, guztiz baliozkoa eta eraginkorra baita oraindik.
7. Aldi berean, emisio modu berriak iritsi hurren omen daudenez gero, bego egina eskaera horretarako ere, emisio digitalerako baimena eta emakidaren eskaera; hala nola entzun-ikusteko hedabideen arloan komunikazio publikoa egiteko beste edonolako sistemez baliatzekoa, hoietarako baimenen beharrik izanen balitz eta horri buruzko erabakia Nafarroako Gobernuari legokiokeen heinean.
8. Gisa berean, eskabide hau aintzat hartua izan dadila eskatzen
dugu Foru Erakundeetan egin beharko diren lege, arau eta plangintzak zehazterakoan. euskarazko komunikazioaren beharrak aurreikusiak eta aintzat hartuak izan daitezen eta hoietarako behar eta komeni adina bitarteko, baliagai, kanal eta emakida prestatu dadin, euskal jendeari zerbitzu egiteko.
ESKATZEN DU
Aintzakotzat eta ontzat hartua izan dadila honako idazki hau, eta, beraz, galdi bedi egina eskaera:
-FM ko irrati emisioen emakidarena, duela 25 urtetik hona behin eta berriro eskatzen ari gatzaizkizuenarena.
-Aurki ezartzekoak omen diren teknologia digitalen edo bestelakoen bitartez emititu ahal izateko behar izanen diren baimen administratiboena.
Sinatzaile
Jose Antonio Solano Arratibel
Iruñean, 2010ko maiatzaren 24 an
Adierazpena
Euskalerria Irratiaren izenean ari gara Irratiari partizipazioa eta sostengua eskaintzen dion EUSKALERRIA IRRATIA ELKARTEko kideak; IRUÑEKO KOMUNIKABIDEAK elkargo eragilekoak; Irrati entzule, kolaboratzaile, adiskide, lantaldeko kideak.
25 urte iragan dira Iruñerriko irrati euskalduna eratzeko eta abiatzeko eskaera formala Nafarroako Gobernuari lehen aldiz egin genionetik.
Ordutik hona aldaketa handiak gertatu dira bai, baina badira orduan bezalatsu aldagaitz irauten dutenak:
Lehen bezala orain ere beharrezkoa da, komenigarria eta egingarria, Iruñerriko euskal jendearen zerbitzuan ari den heda- eta komunikabidea.
Lehen bezala orain ere sendoa da hemen bildu garenon –eta beste aunitzen- konpromisoa eta deliberoa euskarazko komunikazio zerbitzua eskaintzeko ahaleginean eta borondatean.
Lehen bezala orain ere emititzeko eskubidearen aitorpena eskatzen diogu Nafarroako Gobernuari, honi baitagokio emakida admnistratiboari buruzko erabakia.
Urteotan aldaerak eman dira gailu, tresna eta teknologian. Aldaketa gehiagoren bezperetan omen gaude. Nonalahi ere, maiztasun modulatuen uhinen bidezko emisioa (FM) oraindik ere guztiz baliozkoa eta eraginkorra denez gero, zilegi eta egoki zaigu gisa horretako emisio analogikorako emakida, luzamendurik eta aitzakiarik gabe, eman diezagutela berriro eskatzea.
Iritsi hurren omen dago emisioen sistema digitala. Bada, horretarako ere eskaera egin dugu: emisio digitalerako baimena edo emakida eskatu dugu, eta komunikazio publikoa beste edonolako sistemaz egiteko, baldin eta baimenen beharrik balitz, eta horri buruzko erabakia Nafar Gobernuaren eskumenean balego, horretarako, zer gerta ere, aldez aurreko eskaera formala egin dugu.
Iragan diren 25 urte luzeotan, Nafarroako Gobernuak behin eta berriro ukatu dio Euskalerria Irratiari emititzeko eskubidearen aitorpena. Nahiz eta egitasmoa guztiz arrazoizkoa izan; aukerak ugari izan dituen arren; ezin konta ahala izan diren arren ebazpenak eta adierazpenak, epaitegien sententziak, erakundeen aginduak eta gomendioak. Hoiei gu[E1] ztiei entzungor egin die Nafarroako Gobernuak.
Horra galdera airean nork bere iritzia ager ahal izan dezan:
Euskalerria Irratiarekiko duen portaera, Nafarroako Gobernuak oro har euskararekin eta euskal jendearekin duen jokaeraren adibide huts ote da, ala zerbait berezia, salbuespenekoa?
Mintza gaitezen.
Iruñean 2010eko maiatzak 24