Josi Basterretxea
Kolore bi nagusitu zaizkit gaurko egunkarien argazkietan: zuria eta lila. Txuri-txuri utzi zuen atzo goizaldeko elurteak Euskal Herria. Ongi erretratatu dute egunkariek elurra, portuetan eta hondartzetan.
Zuria batetik, eta lila bestetik. Euskal Herriak lila kolorea hartu baitzuen eguerdi-arratsalderako.
Emakumeek salatu dutenez, handitu egin du krisi ekonomikoak beren lan-prekarietatea. Gizonezkoenak baino, ehuneko hogeita zortzi baxuagoak dira emakumeen soldatak gaur.
Lila kolorea lagun, tratu txarrak, diskriminazio soziala eta lan-prekarietatea salatu dituzte emakumeek.
Elurrak joan, badoaz: eguzkiak urtuko ditu izotzak, eta bazterrak epelduko. Ziklikoa baita eguraldia: gaur leia, bihar lore.
Baina, emakumearenganako mespretxua ez doa, joan. Ez du eguzkiak eramango bere zikloan. Beste eragile baten beharra du horrek. Eta ez da astro bat. Hanka bi ditu eragile horrek. Beso bi.
Gizakia du izena. Eta horien artean, oro har, gizona da gauzak aldatzen eta askatzen has daitezen, torlojuari bestaldera eragin behar diona. Eta, horretan gaude.
[audio http://euskalerriairratia.files.wordpress.com/2010/03/basterretxea20100309.mp3]