Nafarroako Gobernuko DNA Bankuak Ezkaba gotorlekutik ihes egindako beste pertsona bat identifikatzea lortu du: Segundo Hernandez Blanco gasteiztarra. Berriki, senide batek emandako lagin genetikoari esker eta hezurretako DNA lortzeko hobekuntza teknikoei esker lortu dute Hernandez dela egiaztatzea.
CNTko militantea zen eta 19 urte zituela egin zuen ihes. Beste gazte batzuekin atxilotu omen zuten 1936ko uztailaren 24an, Gasteiztik ihes, Otxandiorako bidean. 1936ko abuztuaren 8an, 20 urteko kartzela-zigorra ezarri zioten, eta Gasteizko probintziako espetxean sartu, 1937ko urtarrilera arte; orduan, Ezkabara eraman zuten. Aita ere, Joaquin Hernandez, 1936ko abenduaren 14an hil zuten.
Aranzadi Zientzia Elkarteko eta Ezkabako Txinparta elkarteko kolaboratzaile Jose Maria Pastorrek emandako informazioari esker, 2015ean atera zuten hobia Eguesibarreko Udalaren ekimenez. Hiru gorpu aurkitu zituzten. Vicente Mainz Landa, Bidankoze herriko bizilaguna, identifikatu zuten lehena izan zen. Eta, ustez, Eliako hobian topatutakoek bestelako bide batetik egin zuten ihes, nahiz eta, Falangeko tropel batek, harrapatu eta hil egin zituen, zelaian lurperatuz.
Segundo Hernandez Blancoren identifikazioarekin 43 dira jada Nafarroako DNA Bankuak identifikatu dituen pertsonak. Horietatik, bederatzi dira ihesaldian parte hartu zuten presoak.
Nafarroako Memoriaren Institutuak berretsi du “1936ko kolpe militarraren ondoren desagertutako eta eraildako pertsonen familia gehiagorekin harremanetan jartzea” ezinbesteko izaten jarraitzen duela. Horretarako, inm@navarra.es helbide elektronikoa zabaldu dute.
