Hizkuntza Eskola

19:30

'Dirurik gabeko juduak' eta 'Beste urte batez'

Xabier Monasteriok itzuli du Michael Golden eleberri autobiografikoa: Dirurik gabeko juduak.  Honetan Michael Gold idazle judu amerikarrak XX. mendearen hasieran New Yorkeko East Side auzo txiroan bizi ziren etorkin juduen bizimodu latza deskribatu zuen. Depresio Handiaren garaian New Yorken bazen miloi bat judu, eta idazle ezkertiar honek xeheki azaldu zituen jende horren pobrezia, zapalkuntza eta klase borroka, komunismoaren aldeko mezua zabalduz. Samira Azzamen Beste urte batez liburua ere itzuli du Monasteriok. Honetan XX. mendearen erdialdean Palestinako literaturan bide berriak urratu zituen idazleak. Palestinar jende xehearen eguneroko bizitza erakusten duten ipuinak dira. Hiru ardatz dituen ipuingintza: gatazka politikoa, emakumea eta pobrezia. Jaume Gelabertek gidatuta Monasteriok liburuok aurkeztuko ditu Hizkuntza Eskola Ofizialeko areto nagusian arratsaldeko 19:30ean.

19:30

'Txerriak eta loreak'

Txerriak eta loreak liburuaren aurkezpena egingo dute Jon Arretxe idazleak eta Uxue Razquin editoreak, arratsaldeko 19:30ean Hizkuntza Eskola Ofizialean. Toureren sagan parentesia eginez, guztiz bestelako nobela beltza dakarkigu oraingo honetan Jon Arretxek. Kokagunea hiri handi bateko lunpen auzo baztertua izan beharrean, egilea bera bizi izandako hiru herrietan garatuko da trama: Basaurin, Gasteizen eta Arbizun. Eta protagonistak jende txiro, etorkin mespretxatu edo kaleko prostituta zaurgarriak izan beharrean, bertoko jatorriko biztanle akomodatuak izango dira, zortzi abizen euskalduneko jendea, eskrupulu gutxirekin ezkutuko negozio aitorrezinetan diharduena. Arbizuko hestebete-lantegi batean gertatzen den txistor lapurreta misteriotsua da abiapuntua, eta hortik aurrera umore klabean idatzitako trama beltza dator, oso beltza, erritmo bizikoa, elkarrizketa ugarikoa.