Iruñean izan da gaur Jose Antonio Santano Espainiako Garraio eta Mugikortasun idazkaria Salgaiak trenera izeneko jardunaldian parte hartzen. Komunikabideekin izandako galde-erantzunetan iragarri du "laster" hasiko dituztela Altsasu eta Y-ren arteko eremuan zundaketa lanetan "zehazten hasteko" Nafarroa eta Euskal Autonomia Erkidegoaren arteko AHTaren lotura nondik eginen den. Iruñea eta Altsasu arteko zatia aztertua dute %50ean Santanoren esanetan eta zati horren inguruko informazio-txostena 2025eko urte hasierarako prest izanen dutela adierazi du. "Oztopo gehiago izan ditugu Altsasu eta Y-ren arteko loturaren azterketa egiterakoan", onartu du. Aralar mendilerroan lagin-zuloak egiteko baimenik ez dute izan zenbait norbanako eta udalen aldetik eta, orain, aurkitu dute zirrikitua: izaera publikoko lur eremuetan edo Nafarroako Gobernuarenak diren lur-zatietan eginen dituzte azterketa lan horiek. "Zailtasun gehiago du Aralar inguruan lanak egitea. 200 eta 300 metro inguruko sakoneran egin behar dira zundaketak", azaldu du Santanok.
"Lur-eremu bakoitzak dituen ezaugarriak izanen dira gakoa erabakitzeko nondik eginen duen bidea AHTak", jakinarazi du idazkariak. Ingurumenean sortuko lukeen eragina, alor ekonomikoa eta beharko litzatekeen denbora izanen dira kontuan hartuko dituztenak deliberamendua hartu aurretik. Ez dute asmorik geldirik segitzeko Santanoren esanetan eta ahalik eta gehien azkartuko dituzte egin behar guztiak AHTa albait arinen iristeko Nafarroara.
