Ultzama Ibaia taldeak salatu du udazken honetako isurketa handienetako bat jasan duela urak. Neurgailuek kutsadura kantitate handia jaso dute, batez ere, amonio nitratoarena. "Ultzama ibaira iristen dira inguruko lurretan zenbait nekazari eta abeltzainek kudeatu ezin dituzten mindaren hondakinak", salatu du Joxe Iribarren Ultzama Ibaia taldeko kideak. Ultzama ibaiaren egoera "larria" dela salatzen ari dira azken hogei urteotan.
"Isuri horrek guztiak kaltea baino ez dio eragiten uraren kalitateari eta inguru horretan bizi diren animalia eta landareei ere. Zeharka, baita norbanakoei ere", ohartarazi du. Izan ere, etxalde askotako animaliek Ultzama ibai horretako ura edaten dute eta baratza askotako landareei ureztatu egiten zaie ur horrekin. Latasan egiten dute kutsaduraren neurketa, baina hortik behera ez da aztertzen zer daraman ibaiak eta jakin badakite, badaudela produktu kaltegarriak ibaian behera ere. Neurri eraginkorrak galdegin dituzte.Egoerarekin kezkatuta, uraren kalitatea maizago ikuskatu beharko luketela iruditzen zaie Ultzama Ibaia taldeko kideei. Garbiketa plan bat ere sortu beharko litzatekeela iruditzen zaie. Administrazioari egin diote eskaera.
