Beldurrari buruzko album umoretsua da Mamuki. 2024ko Etxepare Saria irabazi zuten Nerea Ariznabarreta idazleak eta Maite Rosende ilustratzaileak. Mamu bat da protagonista. Gela batean gertatzen da istorioa. Ikara eta sustoa dira nagusi, baina baita mukia ere. "Mukiz josia dagoen mamu bat da protagonista. Gaixo dago eta ohiko egun batean egiten dituenak baztertu beharrean ikusi du bere burua. Sustoak ematen segituko du, hori bai", adierazi du Ariznabarretak. Beldurra eta adiskidetasuna umorez lantzen dituen albuma da Miren Asiain epaimahaiko kidearen esanetan: "Mesanotxe askotan egonen den liburu faboritoa bilakatuko da etxe askotan".
"Zerbait pedagogikoa izan gabe, dibertigarria da liburua", adierazi du Pamiela argitaletxeko Carmen Elvirak. Hausnartzeko tarte bat ere ematen du Ariznabarreta eta Rosenderen esanetan: "Gaixorik gaudenean sortzen zaigun frustrazioaz pentsatzeko aukera bat izan daiteke". Abesti bat ere sortzeko ideia badute buruan. Ipuina kontagarria delako guztiz: "Errimak garrantzia handia du testuetan. Ipuin kontalaria naizen aldetik, horrek aukera ematen die haurrei lerroen bukaerak errepikatu edo asmatzeko adibidez", azaldu du Ariznabarretak.
Barruko mamuak ateratzeko bidea izan daiteke Mamuki, "umorea beti bizilagun" duena. Salgai dago albuma 15 euroan.
Ibilbide luzeko saria
Etxepare Saria 23 toki entitatek sustatzen dute eta haurrentzako album ilustratuak sortzeko proposamena egiten du. Pamiela argitaletxeak eta Galtzagorri elkarteak laguntzen dute eta Euskarabidearen babesa ere badu. 2025erako edizioa urtarrilean aurkeztuko dute.
