Administrazioan Euskaraz taldeak prentsa ohar baten bitartez gogora ekarri duenez, 2021eko azaroan, PSOEren Espainiako Gobernuak ETB3 Nafarroa Garai osoan ikusi ahal izatea ahalbidetzea adostu zuen EH Bildurekin, baina egun Lakuntzann, Lekunberrin eta beste hainbat udalerritan ETBren haurrentzako euskarazko katea ikusi ahal izan gabe segitzen dute.
Gauzak horrela, Administrazioan Euskaraz taldeak Nafarroako Gobernuari galdetu dio ea zertan diren ETB3 Nafarroa osora zabaltzeko lanak. Hasiera batean, foru exekutiboak zioen multilpex autonomikoan berezimen handiko bosgarren kanal bat sartzea posible izanen zela. Abuztuan idatziz emandako azken erantzunean, gobernuak aitortzen du hori ez dela posible, irtenbide bakarra beste multilpex bat martxan jartzea litzatekeela eta hori ez dagoela aurreikusita, betiere Administrazioan Euskaraz taldeak zabalduriko oharraren arabera.
“Umeek euskarazko edukiak izatea funtsezkoa da familia euskaldunetan zein erdaldunetan; izan ere, bestela erreferentzia horiek erdaraz jasoko baitituzte”, nabarmendu du Administrazioan Euskaraz taldeak prentsa oharrean.
Euskararen aldeko taldeak gogora ekarri du 2021ean, Katalunian, Super3 haur eta nerabeen kateak oso audientzia txikiak zituela, haurrentzako eta nerabeentzako kateetan audientziarik txikiena zuela. Haatik, 2022an, Super3 itxi eta SX3 sortu zuten. Inbertsio handiak egin zituzten eta eduki erakargarriz bete zuten. Ohiko telebistan eta online edukiak ditu. Eta hala, egun, haur eta nerabeen artean katerik ikusiena da.
Honatx prentsa oharraren azken mezua: “Ongi legoke ETB3k bide bera egitea, baina ETBko zuzendari Unai Iparragirrek aitortu zuenez, buruan duten gauza bakarra da ETB3 ohiko telebistatik kentzeko aukera, eta edukiak interneten bakarrik uztea. Beraz, hona hemen gutre eskaerak: ETB3 emititzea Nafarroa osoan, eta ETB3k Kataluniako SX3 bideari segit diezaiola. Euskararen transmisioa dago jokoan”.
