Erosahalmenaren galerak eta etxebizitzaren prezioaren gorakadak emantzipazio-tasa ehuneko sei puntu jaitsi dute azken hamarkadan; datu hori estatuari dagokionez. Eta, Europar Batasuneko datuekin alderatuta, %15 gutxiago da estatuko emantzipazio tasa.
Alokairuen prezioak ere kezka sorrarazten du. Nafarroako gazteek soldataren %68 erabiltzen dute alokairua ordaintzeko. Hartara, 16 eta 29 urte bitarteko pertsona bakar batek alokairua bere gain hartzea edo etxebizitza baten sarrera ordaintzea ia bideraezina bihurtu da azken urteotan. Espainiako Gazteriaren Kontseiluaren Emantzipazio Behatokiaren azken txostenaren arabera, Nafarroako gazteen %16,2 soilik zegoen independizatuta joan den urtearen amaieran, beraz, 30 urtetik beherako bost pertsonatik lauk gurasoen etxean bizitzen jarraitzen dute.
Arrazoi nagusien artean bada bat nagusia: azken urteotan soldatak oso gutxi hazi dira bizitzaren kostuarekin alderatuta eta, bereziki, etxebizitzaren prezioarekin alderatuta, maximoetan baitago. Nafarroako langabezia-tasa Estatuko txikienetakoa da eta gazteen batez besteko soldata Espainiako hirugarren altuena da, baina, hala ere, Foru Erkidegoko emantzipazio-tasa estatukoa baino baxuagoa da.
