Guztira 987 kasu jaso dituzte 2023. urtean Behatokian, gehienak kexak: 909. "Argi dugu hauek errealitatean gertatzen denaren lagin bat besterik ez direla", esan du Garbiñe Petriati Behatokiko teknikariak. Hizkuntz Eskubideen Behatokiak iazko txostena aurkeztu du Iruñean. "Eremu askotan gertatzen dira euskararekiko mespretxuzko jarrerak eta eskubide urraketak. Administraziotik hasita", azaldu du Behatokiko zuzendari Agurne Gaubekak. "Espainiako Gobernuak ez du betetzen webguneari dagokiona, ia erdara hutsez baitu. Euskarazkoak baldin badaude trakets idatzirik edo akatsez beteak izaten dira", jakinarazi du Petriatik. Nafarroari dagokionez gabezia ugari ere badirela ohartarazi dute: "Karteldegietatik hasi eta azpikontratatutako zerbitzuak eskaintzeko euskara eskakizunik ez izaterainoko hizkuntz urraketak atzeman ditugu", gaineratu du Petriatik.
Osasun arreta ere ez da euskalduna izaten ahal Osasunbidean. "Harrera guneetan eta osasun alorreko administrazio tramiteetan ere ez dago euskaraz egiterik eta arreta ere ez dago euskaraz jasotzerik", adierazi du Petriatik. Segurtasun indarrekin, poliziekin, gertatzen dena ere ez da gutxiagorako: "Zenbaitetan euskaraz eurengana zuzenduta erasotzat hartzen dute herritar horren jarrera", azaldu du. 2023an atzerapausoak eman ziren euskararekiko. Eta oraindik ere ematen ari dira.Ohartarazpen bat ere egin nahi izan dute amaitzeko: "Eskaintza eta eskaria merkatuaren parametroetara eramaten ari dira".