Aldaketa klimatikoaz hitz egiten da etengabe gaur egun. Zer gertatzen ari den jakiteko bide ematen dute lurrazpiko eremuek. “Kobetan erregistratuta geratzen da lurgainean egiten dugun guztia”, jakinarazi du Arantxa Aranburu geologoak. Atzo saria eman zioten egiten ari den lanarengatik. Lurpea 2024 sariarekin aitortu dute lana Euskal Herriko zortzi leizeetako arduradunek. “Geologia bokazio du Aranburuk eta sentsibilizazio eta maitasuna erakusten du haren eginkizunetan”, azaldu dute saria emate ekitaldian. Oso eskertuta jaso du aitortza geologoak: “Ilusio berezia egiten dit sari honek. Lurzoruaren berri gizarteari erakusten diotenen eskutik jasotzeak esanahi handia du niretzat”, adierazi du.
Estalaktitetan eta estalagmitetan dena gelditzen da “grabatua”: “Zein heinean da egoera edo gertaera bat naturala, portaera bat arrunta jakiteko lurrazpiak asko adierazi dezake”, esan du Aranburuk. Izan ere, kanpoan, lurrazalean egiten den edozer geratzen da erregistratua: “Ingurumenean egiten ditugun aldaketak, botatzen ditugun zaborrak eta egun ohiko bilakatu diren mikro-plastikoak dagoeneko agertu dira kobazulo barrenetan”, jakinarazi du. Historian zikloak nolakoak izan diren eta gertatzen ari dena “naturala” ote den argitzeko baliagarria da leizeetan izaten diren aldaketak aztertzea.
