Aurreko planen ildo estrategikoetan sakontzeaz gain, 2024-2028ko proiektuaren sustatzaileek azpimarra jarri dute, batetik, ikasgelan antzemandako indarkeria matxista mota ororen "prebentzioan, detekzioan eta esku hartzean"; eta, bestetik, planaren beraren ebaluazioan. Izan ere, datorren ikasturtean, Skolaeren ziklo osoa bukatuko dute Nafarroako 114 ikastetxetan. Programaren ibilbidea eta helburuen betetze maila aztertu nahi dituzte, lehen aldiz.
Hezkidetza planean urrats gehiago egin nahi dituzte "indarkeria sexista ororen aurka prebenituko duen eta genero arrakalak erauziko dituen eskola eredu bat" bermatzeko bidean. Skolae hezkidetza programari eusteko eta hura ikastetxe are gehiagotara zabaltzeko asmoa du Nafarroako Gobernuak. Planaren nondik norakoak aletu dituzte Nafarroako Gobernuko Hezkuntza kontseilari Carlos Gimenok, Hezkuntzako zuzendari nagusi Gil Sevillanok eta Hezkuntza Departamentuko Berdintasun eta Bizikidetza ataleko buru Itziar Irazabalek. Mota guztietako indarkeria sexistak prebenituko dituen eta emakumeen eta gizonen arteko desberdintasunak ezabatuko dituen eskola-eredu bat finkatzea da Hezkuntza Departamentuak prestatu duen 2024-2028 Hezkidetza Planaren helburu nagusia. Plan hori jendaurreko erakustaldian dago, herritarrek ekarpenak aurkez ditzaten.
Skolae 2017. urtean abian jarri zenetik, Nafarroako 284 ikastetxe publiko eta itunduetan ezarri dute, guztien %87tan, alegia. Gobernuaren asmoa da datozen urteetan programaren zabaltzea bururaino eramatea.