10. urteurrena ospatzeko saski berezia eta bakarra prestatu du Errigorak. “Garenak, izan garenak eta izan nahi dugun guztiak batu nahi ditugu, hamarkada baten ostean, fase berri bati elkarrekin eta indarberrituta ekiteko”, adierazi du Errigorak. Eta, asmo hori betezeko, propio moldatu dugu aurtengo saski-eskaintza. Aurtengo kanpainan saski “originala, biribila eta biderkatzailea” prestatu dute. Hastapenetan bezala, 50 eruoko saski bakarra, “inoiz baino gehiago banatzeko”. Gainera, Errigoraren komunitatearen argazki erraldoia atera nahi dute kanpaina honetan.
Saskiak 23 ekoizleren ohiko 9 produktu ekologiko eta konbentzionalak nahasian ditu eta eskaerak webgunean egin daitezke gaurtik azaroaren 9ra bitartean. Hala ere, Interenet bidez eskaera egin nahi edo ahal ez duenak beste bide bat izango du saskia eskatzeko: kanpainako eskuorriak dakarren inprimakia betez ere egin daiteke.
10 urte bete-bete
Urriko egun batean, 2013an Iruñeko Nabarreria plazako Zabaldi Elkartasun Etxean jaio zen Errigora. "Nafarroa hegoaldekoak produktuak Euskal Herrian zehar zabaltzeko" eta "zonaldeko euskalgintzari ekarpena egiteko" xedea zuen egitasmoa aurkeztu zuten eta hilabetean asmoak egitate bihurtu zituzten, eta gaurdaino asmoak bete dituzte.
Bertako produktuak eta bertako hizkuntza uztartzeko proiektua da Errigora. 130.000tik gora saski bete dituzte, eta, aldi berean, euskalgintzaren zakua ere oparo bete dute saskiek emandako mozkinekin, 1.800.000 euro, alegia. Urtero boluntario, ekoizle, kontsumitzaile eta bidelagunak batzen dira Errigoraren komunitatera. Udazkenetako "Euskarari puzka" kanpaina da sentsibilitate eta komunitateko kide guztiak bereziki batzen ditu, "ekoizleengandik hasi eta euskalgintzako bidelagunenganaino".
