Udaberria biziki beroa eta lehorra izan da, maiatza "arruntagoa" izan arren

Euskalerria Irratia 2023ko eka. 7a, 17:21
  • “Oso uda zaila” aurreikusten da estatu osoan zehar, suteei dagokienez.
  • Euriteei dagokienez, hiruhilekoa "oso lehorra" izan da.

Peio Oria Nafarroako AEMETeko zuzendariak jakinarazi duenez, 2023ko udaberria Foru Erkidegoan 1961az geroztik izan den lau beroenetakoa izan da (2011, 2017 eta 2020koekin berdinduta), eta hirugarrena lehorrena. Datorren ekainaren 21ean hasiko den urtaro aldaketaren harira gaur eskainitako prentsaurrekoan hala adierazi du Oriak eta udaberriko gorabeherak aztertu ditu. Martxoaren hasiera "hotza izan zen garai hartarako, baina gero martxoko eta apirileko zati handi bat, baita maiatzaren hasiera ere, guztiz kontrakoa", "oso beroa" izan zen, tenperaturak "batez bestekotik hainbat gradu gora" geratu baitziren.

Nafarroako tenperaturei dagokienez, maiatza "normalenera gehien hurbildu den hilabetea" izan dela esan du AEMETeko zuzendariak, izan ere, "nahiko bero hasi zen, baina gero bi aste izan ditugu iparraldeko haizeen prebalentziarekin eta, horren ondorioz, tenperaturak ez dira bereziki altuak izan".

Euriteei dagokienez, hiruhilekoa "oso lehorra" izan dela azpimarratu du, "Nafarroan hirugarren lehorrena erregistratuta daudenetik". "Batez besteko defizita 100 litroraino iristen da metro koadroko. Iaz egoera txarrean geunden, eta urtarrilean prezipitazioak egon zitezkeen arren, udaberriko tonikak euri falta kezkagarri hori uzten jarraitzen du", nabarmendu du.

Azken asteotako euriteen ostean urtegiek bizi duten egoeraren inguruan  "egoera ez dela hobea" iragarri du. Nekazaritza urtea Nafarroan "oso lehorra" izan da, "normala dena baino askoz ur gutxiagorekin". Kezkagarritzat jo du halaber, maiatzaren 20an Beran izandako uholde "larriak", “metatutakoa ia % 200era iritsi zen soilik ordu batzuetan”. Peio Oriak jakinarazi duenez berri txarrak daude eta “gertaera meteorologiko eta klimatikoak gero eta muturrekoagoak izango dira eta maizago gertatuko dira”.

Udarako aurreikuspena

"Normalean baino tenperatura altuagoak" izateko aukera oso handia dela adierazi du Oriak, eta, oro har, "badirudi beroagoa izan daitekeela" Mediterraneorantz zenbat eta gehiago egin. Hala ere, azpimarratu duenez, "ez dakigu uda hau iragana bezain muturrekoa izango den, ez baita berdin hasi". "Iaz maiatzean udako tenperaturak izan genituen eta hori ez da horrela izan aurten", azaldu du. 

Hala ere, suteen inguruko "kezka" agertu du, "estres hidrikoa handia baita". "Zelatan egon beharko dugu, oso uda zaila aurreikus daiteke, ez soilik Nafarroan, baizik eta orokorrean, penintsula osoan". Dagoeneko baso-sektorearen alerta piztuta dago, "datozen asteetan zehar bero-bolada bat iristen denean, sute-arriskuaren muturreko mailetara itzuliko garelako".

Udako prezipitazioei dagokienez aldiz, "badirudi ohi baino euri gehiago egiteko aukera txikiak izan ditzakegula", baina aurreikuspen horrek "fidagarritasun txikia" du eta "udan izaten den prezipitazio motari oso lotuta" dagoela zehaztu du.

EUSKALERRIA IRRATIAzale hori:

FM 98.3ko zein euskalerriairratia.eus webguneko edukiak musu truk entzun, irakur eta ikus ditzakezu.

Zuretzako eskari bat dugu: posible baduzu, lagun gaitzazu gero eta eduki gehiago eta hobeak sortzen, Iruñerriko euskaldun ororen eskura jartzeko.

Izan ere, zenbat eta komunitate handiagoa, orduan eta proiektu komunikatibo eraginkorragoa.


Bazkidetu zaitez!