Nafarroako Gobernuak Belateko tunela bikoizteko lanen lizitazioa iragarri du asteazken honetan. Esleipena 95 milioi eurorengatik egin dute.
Nafarroako Gobernuko presidente Maria Chivitek, Estatuko Gobernuko ordezkari Jose Luis Arastik, Lurralde Kohesiorako kontseilari Bernardo Cirizak eta Herri Lanetako zuzendari nagusi Pedro Lopezek asteazken honetan eman dituzte Nafarroan datozen 4 urteetan egingo den bide-lan esanguratsuenaren esleipenaren xehetasunak.
N-121-A errepidearen segurtasuna hobetzeko mugarri berri bat iritsi dela nabarmendu du Txibitek: "Baztan eta Bidasoa inguruko 22.000 bizilagunekin zor historikoa ixtea ahalbidetuko duen obra da". Presidenteak gogorarazi du "tunelak duela 25 urte ireki zirenean, Belateko portuaren alde bateko eta besteko lurraldeak urruntzen zituen banaketa-horma bat gainditu" zuela Nafarroak; orain, "ezinbesteko komunikazio-arteria horri eusteko beharrezko segurtasuna eta bermea handitzea" lortzeko erronka plazaratu du, "gure erkidegoa Iruñetik iparralderantz egituratzen baitu eta zuzenean lotzen baikaitu Europarekin".
Nafarroako presidenteaak azpimarratu du beharrezkoa dela "errepideetan inbertitzea zerbitzu publiko gisa", eta bere garrantzia azpimarratu du l"urraldearen konektibitatea eta garapen sozioekonomikoa sustatzeko".
Tunel berria egiteko epea 45 hilabetekoa izango da, eta 95 milioiko lizitazio-aurrekontuak partida nagusi hauek hartzen ditu barne: indusketa-lanak (35 milioi), mantentze-lanak (16 milioi), estaldura (10 milioi) eta segurtasun-instalazioak (7 milioi), besteak beste.
Nolakoa izango da?
Belateko tunel berriak 2.885 metro inguruko luzera izango du, egungo galeriaren antzekoa. 28+010 kilometroan hasiko da, oraingo sarreraren ezkerraldean, eta 30+895 puntuaren inguruan amaituko da, egungo iparraldeko sarbidearen ondoan. Beraz, tunel berri hau hegoalderako noranzkoan zirkulatzeko erabiliko da, Iruñerako noranzkoan.
Larrialdietarako bost galeria eraikiko dituzte, 500 metrotik behin, egungo tunelarekin lotzeko. Galeria nagusiak larrialdietako ibilgailuak pasatzeko aukera emango du, eta beste laurak oinezkoentzat izango dira, ibilgailu arinetarako sarbidearekin.
Tunel berriaren bi erreiek 3,5 metroko zabalera izango dute, eta 3 metroko bazterbidea izango dute eskuineko aldean zirkulazioaren noranzkoan, eta metro 1ekoa ezkerraldean. Galtzadaren bi aldeetan 0,75 metroko bi espaloi proiektatuko dira. Galiboa 5,5 metrokoa izango da, hau da, tunel horren barrutik zirkulatzen duten ibilgailuentzat baimendutako altuera.
17 haizagailu dimentsionatuk osatutako aireztapen-sistema bat izango du. Horrek bermatzen du tutuaren ingurumen-mailei eutsiko zaiela eta sutea gertatuz gero kea aterako dela.
Ikurrei dagokienean, kanpoko eta barruko hainbat euskarri izango ditu. Tuneletik kanpo 4 semaforo, 2 itxitura-hesi eta mezularitza-panel bat jarriko dira, eta barruan erreiari eragiteko 16 panel, abiadura-mugako 16 panel, 16 semaforo, mezularitzako 2 panel eta seinale fotoluminiszenteak jarriko dituzte.
Horrela, Belateko tunelak bikoiztuz gero, noranzko bakarreko galeriak izango ditugu, zirkulazio-noranzko independentekoak, hodi bakoitzetik zirkulatzen duten ibilgailuen kopurua murrizteko. Gainera, larrialdietan, bi tunelak lotzen dituzten galeriak jartzen dira, eta erantzuteko gaitasun handiagoa eta esku-hartze arinagoa lortzen da.
Teknika austriarra
Lanak antolatzeari dagokionez, eguneko 24 orduetan txandak antolatzea aurreikusten da, lurpean egingo diren lanak egiteko, baita tunelaren bi ahoetatik paraleloan egingo diren eraikitze lanetarako ere.
Belaten egindako azterlan geoteknikoaren arabera, galeriaren % 70 inguru sekzio osoan induskatu ahal izango da, eraikitzeko zailtasun txikia edo oso txikia duten tarteetatik igarotzen baita. Tunelaren % 30 kalitate geologiko txarragoko edo konplexuagoko eremuetan induskatu beharko da, eta, beraz, Austriako Metodo Berria (NMA) erabiliko da tunela eraikitzeko.
Obrak egiteko bi fase daude: aurreratzea eta txikitzea. Aurrerapen-fasean, tunelaren sekzioaren goiko erdia induskatuko da (ganga-aldea). Aurrez aurre irekitzen den bakoitzean, aditu geotekniko batek egiaztatu eta ziurtatu behar du euskarria nahikoa dela edo beharrezkoa den nolabaiteko errefortzua. Ganga finkatu ondoren, txikitze-fasea hasiko da, tunelaren sekzioaren beheko erdia zulatzeko. Belateren kasuan, jatorrizko galerien funtzionamendua aztertu ondoren, hormigoizko estaldura oso bat egitea erabaki da.
Belateko eta Almandozko tunelak bikoizteko obrak faseka egingo dira. Herri Lan eta Azpiegituren Zuzendaritza Nagusiak aurreikusitako kronogramaren arabera, lehenik eta behin, lizitatu berri diren Belateko tunela bikoizteari ekingo zaio; eta pixkanaka, Almandozko tunelarekin, tunelen arteko tartearekin eta, azkenik, egungo Belate eta Almandozko galeriak eguneratzeko lanekin jarraituko da.
Maila ekonomikoan, Belate eta Almandoz bikoizteko proiektu osoak 180 milioi euroko inbertsioa suposatzen du, eta, gainera, lanaldi osoko 2.500 lanpostu baino gehiago sortuko ditu, eta Balio Erantsi Gordineko (BEG) 100 milioi euro inguruko ekarpena eragingo omen du.
