Nafarroako Gobernuak 104 milioi euro biltzea aurreikusi du 2023an eta 2024an, Espainiako Gobernuarekin hitzartu dituen zerga berrien kudeaketaren bidez; besteak beste, bankuei edo energiari ezarritako zergak, edo berrerabili ezin diren plastikozko ontzien gaineko zergen diru bilketaren parte hartuko du bere gain Foru Erkidegoak.
Estatuan ezarriko den fortuna handien gaineko zerga berriaren kasuan, Nafarroak bere gain hartuko du bere araudi propioarekin, baina praktikan ez da aldatuko diru bilketa hori, Foru Erkidegoan ondarearen gaineko zergak indarrean jarraituko baitu. Arlo horretan Nafarroaren autogobernua indartuta ateratzen dela zehaztu du Elma Saiz Ogasun kontseilariak.
Saizen arabera, egun garrantzitsua da gaurkoa Nafarroarentzat Hitzarmen Ekonomikoaren Negoziazio eta Koordinazio Batzordeen gaurko bilerek "balioan" jartzen baitituzte Gobernu zentralaren eta Foru Erkidegoaren arteko "harreman sendoek, autogobernantzan sakondu, aurrera egin, besterik egiten ez baitute".
Elma Saizek azaldu duenez, "Nafarroaren eskumenen defentsan sakontzen duten akordioak sinatu dira, Estatuko Administrazioarekin den aldebiko harremanetik abiatuta". "Nafarroaren autonomia indartzen da, sortzen ari diren zerga-figura berriak kudeatu eta biltzerakoan", nabarmendu du.
Kontseilariak azaldu duenez, energia eta finantza erakundeei ezarritako aldi baterako kargen kasuan, Nafarroak Espainia osoan 2023an eta 2024an sortutako diru-sarreren bolumenaren % 1,6 jasoko du. Berrerabili ezin diren plastikoen kasuan aldiz, Nafarroan ekoizten diren produktuen ekoizleei aplikatuko zaizkie.