Laugarren amaitu du Bertsolari Txapelketa Nagusia Sustrai Colinak, 1495.00 punturekin. Final berdindua izan da, hamabost puntuko aldea baino ez dago-eta hirugarren eta bosgarren egin dutenen artean. Hor kokatu zuen haren burua Colinak bertsotan ari zela. Egindakoa aztertu ondoren. amaierara arte lehian egoteak zenbateraino baldintzatu ote zuen zalantza du orain: “Eustera behartzen ninduen horrek. Agian lehenago erori izan banintz eginen nuen Tourra galduta duenaren ihesaldirik”.
Hala ere, emaitzak eta zenbatekoak erlatibizatu behar direla nabarmendu du urruñarrak, Euskalerria Irratian. Azken bertso saioan izan zen txapela jokoan, baina txapelketa ez zen Nafarroa Arenan hasi: “Txapelketarekin konforme gelditu naiz, uste dut egin dudan finala baino txapelketa hobeagoa egin dudala”. Hausnarketa bat eragin dio horrek: “Zenbateraino baldintzatzen du emaitzak analisia?”
Zazpigarren txapelketa izan du amaitu berri dena Colinak. Bizileku duen Iruñean jokatu zen finala, eta berezi egin zuen horrek azken saioa harentzat: “Hasteko bertsozale bezala, finala tokiz aldatzen diren aldiro aro berri baten irudikapena izaten da. Gero, hemen bizi naizenez gero, egunero zapaltzen dituzun kaleetan zure bizitzako egun inportante bat bizitzeko aukera izatea inportantea da, noski”.
Bereizgarri gehiago izan zituen igandekoak. Belaunaldi berri bat hartu zuen oholtzak, hiru emakume izan ziren aurrenekoz kantuan… Bizi duen plazaren isla dela dio Colinak, eta finalaren kasuan bezala, garrantzi gehiago duela kalitateak kantitateak baino.
Momentuz datorrenari helduko dio, plazetan; eta ez du erabaki datorren txapelketan parte hartuko duen.