Nafarroako Osasun departamentuak aurretiazko borondateen dokumentuaren (ABD) erabilera sustatzeko kanpaina aurkeztu du. Dokumentu horri bizi-testamentua ere esaten zaio, eta erabakiak hartzeko aukera bermatzen du norberak bere borondatea adierazteko gaitasuna galdu denean. Nafarroako herritarrei bizitzaren amaierarekin lotutako egoerei eta erabakiak hartzeko autonomia hobetzeko dauden aukerei buruzko informazioa emateko kanpaina da aurkeztutakoa. Azken datuen arabera, Nafarroa da, 1.000 biztanleko 19,93 ABDrekin, Estatu osoko dokumentu horien erregistro-tasarik handiena duen autonomia-erkidegoa, non 8,06ko batez bestekoa dagoen.
ABD bizitzaren amaierako etapak ahal den neurrian duintzeko eta humanizatzeko estrategiaren barruan kokatu du osasun agintaritzak. Kanpainaren aurkezpenean zehaztu dute "Dokumentuak erabat errespetatzen" dituela "aukeratzeko askatasuna eta pazientearen autonomia".
Nafarroako biztanleria orokorrari zuzenduta dago kanpaina, baina 50-55 urtetik gorako biztanleei arreta berezia jarriz (adin horretatik gorako pertsonek kudeatu dute gehien dokumentu hau). Ekintza honen helburua irisgarritasun unibertsala bermatzea da, bizitzaren amaierako arretari buruzko informazioa pertsona guztiengana irits dadin, eta osasun arloan autonomiari eta erabakiak hartzeari mesede egin diezaion.
Horrela, bai ABD egiteko jarraitu beharreko urratsak azaltzen dituen webgunea (gaztelaniaz zein euskaraz), bai material grafikoak eta bisualak hizkuntza errazean, irakurketa errazean eta pdf eskuragarrian egongo dira eskuragarri.
Aurretiazko borondateen dokumentua egin ahal izateko, herritarrek beren osasun-zentroan izapidetu dezakete Gizarte Laneko langileekin, eta, halaber, aurretiko hitzordua erreserbatu dezakete Osasun Saileko Osasun Herritarren Zerbitzuko Aurretiazko Borondateen Erregistro Ofizialeko langileekin (Amaya kalea 2 A, Iruña).
Era berean, banaka egin daiteke. Aukera bat da lekuko izango diren hiru pertsonekin, adin nagusikoak (gutxienez bi, familia eta ondare-harremanik gabe); eta beste aukera bat da notario aurrean egitea. Bi kasuetan, dokumentazioa Nafarroako Gobernuaren erregistro eta arreta-bulegoen bidez aurkeztu behar da (telematikoki edo aurrez aurre).