Nafarroako Dynamobel enpresak bulegoetarako altzariak eta konponbideak fabrikatzen ditu. Krisi larria bizi izan du, baina bigarren aukera bat izanen du Cofidesen laguntzen bitartez: 7,5 milioi euroko mailegua jasoko du, Espainiako Gobernuak Covid 19ak kalteturiko enpresak birkapitalizatzeko eratu duen funtsetik. Laguntza hori jaso ahal izateko, ordea, bideragarritasun plan zorrotz bat aplikatu beharko du, eta horren barruan zuzendaritzak lan taldeko %25 kaleratzea planteatu du, hau da, 70 langile kalean uztea.
"Bideragarritasun-plan hau gauzatzea ezinbestekoa da kreditu hori baimentzeko", azaldu du konpainiak ohar batean. Gainera, enpresak ziurtatu duenez, dagoeneko gainditu ditu "Cofidesek izendatutako rating-erakundearen kaudimen-azterketa zorrotzak, baita bideragarritasun-plana ere, zeinak gainditu baititu kreditu-erakunde publikoaren kanpo-aholkularien analisiak".
Dynamobeleko zuzendaritzak plan horien berri eman die enpresa-batzordeari eta lan-agintaritza eskudunari, eta "plantillaren % 25 berregituratzea, jarduerak Azkoiengo fabrikan kontzentratzea eta soldata-kostuak murriztea dakarte". Enpresak azaldu duenez, Berriobeitiko lantegirako alternatibak aztertzen ari da inbertitzaile berrien bidez.
Dynamobelek ziurtatu duenez, "erabat gardena izateko asmoz", bilera bat egin du Azkoiengo fabrikako langileekin, eta laster Berriobeitikoarekin bilduko da, eta enpresa-batzordeari adierazi dio "elkarrizketa eta akordioa" nahi dituela.
"Dynamobel pandemiak, konfinamenduak eta murrizketek eragindako krisiaren ondoriozko zailtasunak gainditzen ari da, eta horrek geldialdi ekonomikoa ekarri dio bulegoko altzarien sektoreari", adierazi du, "enpresa estrategikoa da Nafarroako Erkidego osoarentzat, 280 pertsonari ematen die lana eta zeharkako eta eragindako ehunka lanpostu sortzen ditu, eta motor ekonomiko garrantzitsua da, teknologikoa izateaz gain, sektorea erreferente bihurtzen duena".
