Nafarroako lehen hilerri digitala sortu dute

Euskalerria Irratia 2021ko aza. 24a, 07:36
Izarra taldeko beilatokietako bat. (Argazkia: Izarra beilatokiak).

Oroimen fisikoko espazioak "ordezkatzeko" asmorik gabe, toki digital honek "elkarreraginean" eta "komunitateak sortzeko" aukera ematen du. Izardi du izena, eta Izarra beilatoki taldeak sortu du.

Izarra beilatokiak Nafarroako lehen hilerri digitala aurkeztu du astearte honetan, Izardi izenekoa, "denboran zehar maite ditugunak omentzeko eta gogoratzeko". Hala adierazi dute Mikel Idoate Izarrako gerenteak eta Mikel Legarra Izarra beilatokien taldeko sustatzaileak.

"Garaiak eta ohiturak aldatu egiten dira, eta horregatik uste dugu gure omentzeko modua eguneratu egin behar dela. Horregatik, oroimen fisikoko espazioak ordezkatzeko asmorik gabe, leku digital bat aurkeztu dugu, hildako pertsona hori gogoratzeko eta haren inguruan ditugun senide eta lagunekin elkarreragiteko ", azaldu dute.

Prentsa-ohar batean jasotzen denez, Izardik bi funtzio nagusi betetzen ditu: informazioa, hildako pertsona bati buruzko informazio publikoa kontsultatu ahal izateko (izena, abizenak, jaiotza- eta heriotza-datak), eta interakzioa, "elkarri eragiteko eta hildako pertsona bakoitzaren inguruko komunitateak sortzeko aukera ematen baitu".
Elkarreragin hori indibiduala izan daiteke (modu pribatuan elkarri eraginez, erabiltzaile bakoitza bakarrik sar daitekeen profil bat sortuz), edo taldekoa, hildako pertsona baten inguruko talde bat sortuz "gonbidatuek oroitzapenak, argazkiak, ekitaldiak, urteurrenak eta abar partekatu ahal izan ditzaten".
Sustatzaileen arabera, Izardi ehorztetxeen beste webgune batzuetatik bereizten da: "Bizitza-luzerarako sortua dago, eta oroitzapen-espazioak sortzen ditu, hileta-zerbitzu baten prestazioetatik harago". Gainera, hainbat taldetan argitaratutako informazioa "beti pribatua eta esklusiboa izango da talde edo profil bakoitzeko pertsonentzat, eta kanaletik kanpoko hirugarrenek ezin izango dute kontsultatu edo ikusi".
Zerbitzu hau doakoa da eta fase ezberdinak izango ditu. Lehenengoak, dagoeneko martxan jarri denak, Izarra beilatokian zerbitzua eman zaien 1.000 hildako baino gehiago biltzen ditu. Ondorengo faseetan, foru-erkidegoan hildakoak sartuko dira, baita beste erkidego batzuetan hildakoak ere, eta eskura dauden ekintzak areagotuko dira. Hori guztia, "hildakoen segurtasuna, pribatutasuna eta errespetua bermatuta".

EUSKALERRIA IRRATIAzale hori:

FM 98.3ko zein euskalerriairratia.eus webguneko edukiak musu truk entzun, irakur eta ikus ditzakezu.

Zuretzako eskari bat dugu: posible baduzu, lagun gaitzazu gero eta eduki gehiago eta hobeak sortzen, Iruñerriko euskaldun ororen eskura jartzeko.

Izan ere, zenbat eta komunitate handiagoa, orduan eta proiektu komunikatibo eraginkorragoa.


Bazkidetu zaitez!