Euskarabideak, UEMA - Udalerri Euskaldunen Mankomunitatearekin batera, euskarazko antzezlan bat sortzeko beka deialdia luzatu du. Arnasa Gara programaren deialdia da eta proiektuak aurkezteko epea azaroaren 15era arte egongo da zabalik.
Proiektuaren irabazleak bere lana 2022ko azaroko Azpeitiko Euskal Antzerki Topaketetan estreinatzeko aukera izango du. Halaber, Dinamoa sormen-gunea erabili ahal izango du sorkuntza-prozesurako, eta bekaren sustatzaileek beste hamar emanaldi antolatuko dituzte gutxienez, estreinaldiaz gain.
Helburu nagusiak dira udalerri euskaldunek eta arnasguneek (euskara hizkuntza nagusia dutenek) euskarari egiten dioten ekarpena nabarmentzea eta herritarrak bertako hizkuntzaren inguruan kontzientziatzea.
Nafarroako iparraldeko 14 udalerrik parte hartzen dute Udalerri Euskaldunen Mankomunitatean, Euskal Autonomia Erkidegoko beste udalerri batzuekin batera. Bertan euskararen ezagutza eta erabilera % 75etik gorakoak dira, eta, horregatik, "arnasgune" deitzen zaie. Horien artean daude Baztan, Leitza, Bera, Goizueta, Etxarri Aranatz, Arbizu eta Areso.
Iragarritako beka jasotzeko, lana euskaraz egin behar da eta proposamenak aurkezteko epea 2021eko azaroaren 15ean amaituko da. Aurkeztutako lanak aztertu ondoren, epaimahaiak 2021eko abenduaren 3an, Euskararen egunean, jakinaraziko du bekaren irabazlea.
Proiektu irabazleak 23.000 euro jasoko ditu guztira, eta gidoiaren zirriborroa aurkeztu beharko dio epaimahaiari 2022ko apirilaren amaiera baino lehen. Era berean, irabazleak bi edo hiru astez Azpeitiko Dinamoa sormen gunea erabiltzeko aukera izango du, antolakuntzak ordainduta, egonaldiak, sormenerako espazioa, baliabide teknikoak, ostatua eta mantenua barne.
Oinarrien arabera, bekaren diru-kopuruarekin talde irabazleak atrezzoko eta eszenografiako gastuak ordaindu beharko ditu besteak beste, eta antzezlana doan eskaini beharko du antolatzaileek zehaztutako lau udalerritan. Antzokirik ez duten herri txikietako emanaldien baldintzak antolatzaileen eta talde irabazlearen artean adostuko dituzte.
