Foru Administrazioan enplegua lortzeko euskara arautuko duen dekretuaren inguruan Gobernuko kideek dituzten desadostasunak "puntualak" dira, Maria Txibite Nafarroako Gobernuko presidentearen hitzetan.
Nafarroako eremu ez-euskaldunean euskara meritu gisa ez baloratzeko erabakia hartu du Funtzio Publikoko Departamentuak, eta Geroa Baik eta Ahal Duguk uko egin diote horri.
Txibitek Peraltan egindako ekitaldi batean kazetarien galderak erantzunez honakoa esan du: "Adostasuna egon dadin egin dugu lan, eta dekretu honetan gehiago dira adostasunak desadostasunak baino. Edonola ere, Funtzio Publikoa da dekretua egiteko eskuduna, azkenean Funtzio Publikorako sarbidea arautzen duen dekretua delako".
"Euskararen ikuspegia Funtzio Publikora soilik ez mugatzea" eskatu du presidenteak. "Euskarabidearentzako baliabideak handitzen jarraitzen dugu, euskarazko hezkuntza modu askean sustatzen jarraitzen dugu, edozein gunetan hala nahi duten Nafarroako haur guztiek euskaraz ikasteko aukera izan dezaten, helduek euskaraz ikasteko aurrekontu-partidak handitzen jarraitzen dugu, baita hedabideek hizkuntza sustatzeko aukera izan dezaten ere", esan du.
Dekretuaren ingurukoa "oso eztabaida puntuala" dela esan du: "Eremu ez-euskaldunean euskararen meritua ez baloratzeaz ari gara, eta hizkuntzen tratamenduaren barruan eztabaida txikia dela uste dut".