Geroa Bai, EH Bildu, Ahal Dugu, I-Eko eta eledunek bat egin dute Steilasen txostenak dioenarekin, baina ezaguna zen arazo bat dela esan dute, eta, azken urteetan zenbait urrats egin diren arren, premiazkotzat jo dute neurri eraginkorrak ezartzea, segregazioa borrokatzeko.
EH Bilduk eta Izquierda-Ezkerrak, gainera, uste dute ikasleak onartzeko araudi berria ez dela nahikoa izango arazoarekin bukatzeko.
Ramon Alzorriz PSNko bozeramaileak, berriz, esan du nahikoa izan ez dena, beste legegintzaldi batzuetan egindakoa dela, eta Carlos Gimeno kontseilariak aniztasunaren arretarako jarritako oinarriak txalotu ditu.
Steilasen txostenetik harago, hezkuntzak toki nabarmena hartuko du aste honetan parlamentuan, hainbat egitasmo aurkeztu dituztelako.
Segregazioari lotuta, hain zuzen ere, Izquierda-Ezkerrak Gimeno kontseilariari sexu edo generoaren arabera ez bereizteari dagokionez legedia betetzeari lotutako galdera egingo dio. Marisa de Simon bozeramaileak eskandalutzat jo du itunpeko zentro batek, zehazki, Irabia-Izagak, esan izana ez dutela legea beteko. Halaber, Izquierda-Ezkerrak eta Navarra Sumak lan bilkura bat proposatu dute familien elkarteekin, azal dezaten zertan diren berdintasun eta hezkidetza planak, kasazio helegitea onartu ez izanaren ondoren, Skolae indarrik gabe geratu den honetan.
EH Bilduk, berriz, heldu den ikasturterako onarpen prozesuari buruzko araudi berriaz aldetuko dio Gimenori; azken egunetan hainbat eremutako ikaste eta familiak salatzen ari baitira Batxilergoa D ereduan egiteko puntuazioa arautzen duen baremoaren aldaketak erreferentziazko ikastetxerik gabe utzi dituela. Honek are zailago bilakatuko du ikasle horientzat euskaraz ikasten jarraitzea, Bakartxo Ruizek salatu duenez.
Azkenik, Navarra Sumak heldu den ikasturtean eskola jardunaldi jarraitua nahitaezkoa izateari buruzko galdera egingo dio Hezkuntza kontseilariari.