ELA, UGT, LAB eta CCOO sindikatuek hirugarren adinekoen zentroen sektoreko lehen hitzarmena negoziatzeari ekingo diote. Maiatzaren 18an sektoreko mahaiaren osaketa egingo da, patronalarekin eta Nafarroako Gobernuarekin.
Hitzarmen kolektibo honek 4.500 langile baino gehiagori eragingo die, Nafarroan zehar 70 zentro baino gehiagotan banatuta dauden langileak, erresidentzia, adinekoentzako eguneko zentro, telelaguntza eta etxeko arretaren artean. Oso feminizatuta dagoen sektorea da, %90etik gora dira emakumeak.
Gaur egun, Mendekotasunari Arreta Eskaintzeko Estatuko VII. Hitzarmenaren menpe daude langile hauek, euren hitzarmen edo itun propioak dituzten zentruak izan ezik. Honek lan-baldintzen aniztasun handia egotea dakar, sindikatuek azaldu dutenez eta Nafarroan baldintza horiek homogeneizatuko dituen erreferentziazko hitzarmenik ez dagoenez, sektorea "deserregularizatua" dagoela salatu dute.
"Honen ondorioz, ezinezkoa da kalitatezko zerbitzua ematea, eta prekarioak diren lan-baldintzak edukitzera kondenatzen ditu langileak", azaldu dute. ELA, UGT, LAB eta CCOOk Nafarroako Hirugarren Adinekoen Zentroen Sektoreko Hitzarmen Kolektibo Sektorial eta probintziala negoziatzen hasteko eskatu diete patronalari eta Nafarroako Gobernuari, "sektoreko profesionalen lan-baldintzak hobetzeko eta hirugarren adinekoei ematen zaien zerbitzuaren kalitatea bermatzeko".