Nafarroako Justizia Auzitegi Nagusiak Skolae egitasmoa baliogabetu zuen, forma akats bategatik: erregelamendu gisa izapidetu behar zela esan zuten, eta ez administrazio-egintza baten bidez, programa hori curriculumean zeharkako gai gisa sartu baitzen.
Duela urtebete, Carlos Gimenoren Hezkuntza Departamentuak ebazpen horren aurkako kasazio helegitea aurkeztu zuen, egitasmoa bertan behera utz ez zezaten, forma akatsa konponduko zutela esanez.
Orain, Espainiako Auzitegi Goreneko bigarren aretoko epaileek helegite hori atzera bota dute, kasazioaren ikuspegitik eraginkortasunik ez duelakoan.
Ebazpena atzo ezagutu zen, eta atzo bertan Nafarroako Gobernuak iragarri zuen Skolae egitasmoari oinarri legala egiteko foru dekretua karrikaratuko duela.
Foru Exekutiboak uste du hezkidetzan aitzindaria den programa honek bere etorkizuna bermatuta duela erkidegoko ikasgeletan, nahiz eta Auzitegi Gorenak kontrakoa jaso duen.
Skolae, aitzindaria eta aitortua
Gaur egun, Nafarroako 200 ikastetxe publiko eta itunpeko baino gehiagok ematen dute hezkidetza programa beren geletan, eta 4.000 irakasle inguruk parte hartu dute programa emateko prestakuntzan. Programa aitzindaria da Espainiako Estatuan, eta UNESCOk aintzatetsi egin du.
Haren helburua da ikasleen hezkuntza afektibo-sexuala hainbat arlotatik jorratzea, funtsezko hainbat helbururekin: sexualitatea bizitzaren funtsezko dimentsio gisa ulertzea; afektuak sexualitatearen zeharkako ardatz gisa txertatzea; sexu, genero eta familia aniztasunari arreta egitea; gorputza askatasunerako eta edertasun kanonik gabeko espazio gisa ulertzea; eta errespetuz bizitzea.