Nafarroako Osasun Plataformak nabarmendu duenez, "erreakzionatzeko unea da", eta osasun arloko profesionalek eta herritarrek "profesionalen arreta eta lan-baldintzak murriztu eta prekarizatzeko kudeaketa negargarri baten aurrean erantzun bateratua" emateko deia egin du.
Bi manifestazio antolatu dituzte aste honetarako Lizarran eta Iruñean, Lehen Mailako Arretaren alde. Lehena, ostiralean, maiatzak 14, 20:00etan, Lizarrako udaletxetik irtengo da. Gizarte Segurantzako Institutu Nazionalaren lokalen lagapena aldarrikatuko du, udalerriko osasun zentroko espazio arazoak konpontzeko. Bigarrena Iruñean izanen da, larunbatean, hilak 15, 17:30ean, Baluarte plazatik.
Plataformako ordezkariek elkarretaratzea egin dute asteazken honetan Iruñeko Conde Oliveto osasun zentroaren aurrean, 'Lehen mailako arreta aurrera' lelopean. Horiekin batera, AZ Ekimena ekimeneko kideak bildu dira, Alde Zaharreko osasun-zentroaren "irisgarritasuna hobetzeko" eskatzeko.
Nafarroako Osasun Plataformak azpimarratu duenez, pandemiak "herritarren osasunerako eskubidea gogor kolpatzen ari da", besteak beste, "aurrez aurreko arreta murriztu delako" edo "lehen Mailako Arretan hitzordua lortzeko denbora gehiago behar delako".
Alde Zaharreko bizilagunak Nafarroako Osasun Plataformaren aldarrikapenekin bat egiteaz gain, auzoko osasun-zentrorako irisgarritasun baldintzak hobetzea eskatzeko bildu dira gaur. Elkarretaratzean, AZ Ekimeneko osasun-zentroko defentsa taldeak deituta, azpimarratu da adinekoak edo mugitzeko arazoak dituzten pertsonak osasun-zentroan sartzea erraztuko luketen obrak egitea beharrezkoa dela eta, horrez gain, eraikinaren beheko solairua birbanatzen ahalbidetuko luketela. Halaber, erabilera anitzeko gela berreskura liteke, arnasketa-zirkuitua ezartzeagatik eta espazioak covid-19 probak egiteko erabiltzeagatik galdu dena.
Auzotarrek aspaldidanik mantenduko eskakizun hau orain dela hilabete batzuk 475 eskarik abalatu zuten, honetarako eta osasun-zentroan dauden beste gabezia batzuetarako irtenbideak eskatuz. Martxoan, Iruñeko Udalak aho batez onartu zuen adierazpen bat, Osasun Sailarekin batera aurrera egitearen aldeko apustua eginez, eraikinaren irisgarritasuna hobetzeko obrak azkartzeko, baina oraindik egin gabe daude obrak.