Gizarte Eskubideen Departamentuko Gizarte Errealitatearen Behatokiak, Tomás eta Lydia Recari García Fundazioarekin lankidetzan, Gizarte Zerbitzuetako Gizarte Berrikuntzaren I. Saria eman dio GenYouth proiektuari. Koine-Aequalitas Fundazioak sustatu du, eta hezkuntzaarloan 6 eta 18 urte bitarteko adingabeen eta nerabeen artean genero indarkeria detektatzeko metodologia proposatzen du.
Epaimahaiaren ustez, GenYouthek "arazo sozial larri eta zabaldu bati” heldu dio. Irakasleen parte hartzea barne hartzen du eta ikastetxeetara jotzen du, maila guztietan izan dezakeen eraginagatik, bai hezkuntza formalean bai informalean. Metodologia berritzailetzat jo du: besteak beste, elkarrizketak egitea adin goiztiarragoetan, haur zaharragoentzako galdetegiak, jolasaren bidez genero indarkeria detektatzeko tresna bat eta aplikazio mugikor baten laguntza.
Ekimena Koine-Aequalitas Fundazioak aurkeztu du. 2002. urtean eratu zen irabazi asmorik gabeko fundazio hori, eta proiektu berritzaileak eta eragin handikoak garatzen ditu gizarte-ekintzaren esparru eta gai desberdinetan, beste erakunde, unibertsitate eta erakunde batzuekin lankidetzan. Epaimahaiak "parte hartu duten hamahiru proiektuen kalitate eta maila handia" aitortu du.
6.000 euroko saria du, eta Mari Carmen Maeztu Gizarte Eskubideen sailburuak emango du, azaroaren 27an egingo den jardunaldi batean. Sariak Nafarroan Gizarte Zerbitzuak ematen dituzten eta berrikuntza eta eraldaketa sozialeko prozesu parte-hartzaileetan garatutako zerbitzu, produktu edo eredu berriekin erronkaren bati heldu dioten erakundeak saritzen ditu.
Maeztuk "zerbitzu sozialetan berrikuntzak egitearen garrantzia" azpimarratu du: "Egungo erronka sozialei erantzungo dieten ideia berriak martxan jarri behar ditugu. Produktu, zerbitzu eta eredu berri eraginkorragoak, efizienteagoak, jasangarriagoak, bidezkoagoak edo eraldatzaileagoak, pertsonei eragiten dien arazoa konpontzen laguntzen dietenak, harreman berriak sortzen eta herritarrak ahalduntzen lagunduz”.
