Antonio Casas eta Antonio Aretxabala geologoek azaldu dutenez, "Esako urtegiaren eskuineko hegala ez da egonkorra, eta 2013tik ez du inoiz lortu egonkortzat jo daitekeen egoerarik". Izan ere, mugimenduak etengabe gertatzen ari dira, hilean 2 eta 4 milimetro artean. Hori kontuan hartuta, presaren handitzeak eta betetzeak milaka pertsonen bizitza arriskuan jarriko dutela ohartarazi dute: “Informeak konfirmatu du ezjakintasuna dagoela, mugimendua dagoela, eta gaia dela ea onartzen den edo ez arrisku hori, eta haren ondorioak, katastrofikoak direla. Arriskua onargarria izateko asko egin beharko luke behera”.
Urtegietan kontuan hartzen den segurtasun-faktoreak 1etik gorakoa izan behar du beti. Baina Esan, hegala etengabe mugitzen ari denez, ezinezkoa da 1etik igotzea. Horrek esan nahi duena da erortzeko eta eusteko auekrak berberak direla, eta urteotako aurrekontuen igoerek ez duela segurtasuna hobetu.
Beraz, adituentzat, obrak gelditu beharko lirateke eta urtegia hustu, magala zergatik mugitzen den ulertzeko eta orduan zer egin erabakitzeko. “Eta ez adabakien politika bat aplikatzen jarraitu, Ebroko Ur Konfederazio egiten duen moduan”, Antonio Casasen hitzetan.
Azkenik, joan den astean izandako lurrikarei dagokienez, azaldu dute ez diotela zuzenean eragin Esari; baina edonola ere, azpimarratu dute Esak ez duela lurrikararik behar mugitzeko.
